Sevilla er komið áfram í 16-liða úrslit Evrópudeildarinnar eftir 2-0 sigur á Lazio í eina leik dagsins í þeirri keppni.

Sevilla var með 1-0 forskot eftir fyrri leikinn á Ítalíu. Wissam Ben Yedder, sem skoraði eina markið í fyrri leiknum, opnaði markareikninginn í þessum leik eftir 20 mínútur.

Staðan var 1-0 í hálfleik. Í seinni hálfleik misstu bæði lið mann af velli með rautt spjald. Á 61. mínútu fékk Franco Vazquez sitt annað gula spjald og tíu mínútum síðar fór rauða spjaldið aftur á loft. Í þetta skiptið var það Adam Marusic, leikmaður Lazio, sem fékk það.

Á 78. mínútu var annað mark leiksins skorað. Það gerði Pablo Sarabia fyrir Sevilla. Þar við sat og lokatölur því 2-0 fyrir Sevilla og samanlagt 3-0.

Á morgun klárast 32-liða úrslitin í Evrópudeildinni.