Fimm breytingar eru gerðar á landsliðshópnum sem tók þátt í Algarve æfingamótinu. Jón Þór segir breytingarnar vera gerðar til að gefa þjálfarateyminu skýrari hugmyndir fyrir undankeppnina sem hefst næsta haust.

„Við gerum fimm breytingar á hópnum og það er í takt við það sem við höfum verið að gera. Við erum enn að þreifa fyrir okkur og notum þessi verkefni til að kanna hópinn," sagði Jón Þór í viðtali við Fótbolta.net.

„Við þurfum að komast að því áður en undankeppnin byrjar hverjir geta leyst þessar stöður af hólmi. Það geta alltaf komið upp meiðsli og leikbönn og annað slíkt í undankeppninni.

„Ég er gríðarlega ánægður með þennan hóp. Þú talar um sterkasta liðið og að það vanti marga sterka leikmenn en við erum líka með marga sterka leikmenn og gríðarlega sterkt lið."

Leikirnir munu fara fram 6. og 9. apríl í Suður-Kóreu. Undankeppnin fyrir EM hefst í ágúst og eru Svíþjóð, Lettland, Slóvakía og Ungverjaland með Íslandi í riðli.

Hægt er að hlusta á viðtali í heild í spilaranum hér fyrir ofan.