„Fyrsti landsleikurinn er alltaf sérstakur, þó ég muni ekki mikið eftir honum. Það er jákvætt að ná að skora. Upplifunin var þó ekki eins stór og margir halda. Það voru kannski tíu manns í stúkunni. Ekkert sem benti til þess að það væri einhver landsleikur í gangi! sagði Rúnar Már við Fótbolta.net.

Markið hans í leiknum var ansi huggulegt.

„Þarna var maður yngri og ferskari og hljóp meira með boltann. Það var frábært að ná að skora og maður á kannski að vera búinn að bæta við en það kemur."

Ísland hefur unnið alla landsleiki sína gegn Andorra en liðið hefur aldrei verið eins skipulagt og það er í dag.

„Úrslitin þeirra gefa það til kynna. Þeir múra fyrir markið, brjóta mikið og tefja. Við getum ekkert breytt því. Við spilum okkar leik og klárum þetta verkefni eins og menn."

Rúnar hefur staðið sig vel í síðustu landsleikjum sem hann hefur spilað. Hvaða væntingar gerir hann varðandi spiltíma í komandi leikjum?

„Ég fékk nokkra leiki í haust og náði vonandi að stimpla mig inn. Ég er alltaf klár. Ég var á bekknum í mörg ár og geri ekki neinar væntingar en verð alltaf 100% klár," segir Rúnar en viðtalið má sjá í heild í sjónvarpinu hér að ofan.