Howe: Þurfum að leysa ýmis vandamál í vörninni

Sigurinn tryggði sjöunda sæti deildarinnar fyrir Newcastle, sem gefur liðinu þátttökurétt í Sambandsdeild Evrópu ef Manchester City vinnur enska bikarinn.

„Þessi leikur var eins og tímabilið okkar í hnotskurn. Við vorum ekki nógu öruggir í varnarleiknum en leikmenn stóðu sig vel og skiluðu sínu. Við vissum að þetta væri komið úr okkar höndum eftir tapið gegn Manchester United, það er óþægilegt en við verðum bara að bíða og vona," sagði Howe.

„Við þurfum að leysa ýmis vandamál í vörninni fyrir næstu leiktíð og ef okkur tekst það þá getum við orðið gríðarlega sterkir. Þetta tímabil hefði getað verið betra en yfir heildina litið þá var það gott.

„Við erum mjög samheldið félag og ég tel okkur hafa tekið eitt skref áfram á þessu tímabili. Það er margt jákvætt sem við getum tekið úr þessu."

Newcastle glímdi við gríðarlega mikil meiðslavandræði á tímabilinu sem settu strik í reikninginn.