„Mér líst mjög vel á þetta. Ég lenti í borginni klukkan sex í morgun (í gær) og nú er hún orðin ellefu um kvöldið. Fyrsti dagurinn er að baki og þetta er búið að vera fínt hingað til. Ég hef ekki séð eða gert mikið en ég hef æft og séð allt í kringum liðið. Mér líst mjög vel á það sem ég hef séð til þessa," sagði Rúnar Már Sigurjónsson landsliðsmaður í samtali við Morgunblaðið.
Rúnar Már skrifaði undir tveggja ára samning við landsmeistarana í Kasakstan, Astana og gengur þar með til liðs við félagið frá Grasshoppers í Sviss.
Astana sem stofnað var árið 2009 hefur unnið deildina í Kasakstan fimm ár í röð hefur leikið í riðlakeppni Meistaradeildarinnar og þrisvar sinum hefur liðið leikið í riðlakeppni Evrópudeildarinnar. Meðal annars fór liðið í 32- liða úrslit Evrópudeildarinnar tímabilið 2017/2018. Það er því greinilegt að Rúnar Már er að fara í gríðarlega sterkt félag á evrópskum grundvelli.
„Allt annað en titillinn er vonbrigði. Liðið vinnur hann á hverju ári og þótt það sé ekki formsatriði, er það krafa. Það er einnig krafa að liðið vinni bikarinn, en það gerist ekki í ár, þar sem liðið er dottið út," sagði Rúnar Már en deildin í Kasakstan er hálfnuð. Astana situr á toppi deildarinnar með 35 stig, þremur stigum meira en Tobol sem er í 2. sæti .
„Í rauninni snýst allt um Evrópukeppnina hérna. Að komast
annaðhvort í riðlakeppnina í Meistaradeildinni eða Evrópudeildinni.
Deildin er eins og hún er og liðið er í efsta sæti, þrátt fyrir að hafa ekki spilað rosalega vel. Ég finn það á fólkinu hérna að allt snýst
um Evrópukeppnirnar og mér líst vel á það," sagði Rúnar í samtali við Morgunblaðið.
Athugasemdir
