„Þetta var erfiður leikur, fótboltalega séð. Það var heitt og völlurinn þurr og erfiður. Mér fannst vera lítið flæði í leiknum, KA menn vörðu stigið sitt vel og voru bara með gott leikplan,'' sagði Arnar Gunnlaugsson eftir bragðdautt 0-0 jafntefli við KA í Pepsi Max deild karla í dag.
Lestu um leikinn: KA 0 - 0 Víkingur R.
„Við reyndum að spila og mér fannst fyrri hálfleikur ganga betur, fengum þar eitt-tvö dauðafæri. Það hefði róað mannskapinn niður en í seinni hálfleik voru þetta svolítið miklar tafir og eiginlega frekar leiðinlegur fótboltaleikur.''
Arnar hélt áfram:
„Það virðist vera svolítið nýr veruleiki sem Víkingur þarf að sætta sig við þegar við erum mikið með boltann og svona. Við erum með leikna stráka og lið reyna að finna leiðir til að vinna okkur og þá er það oftast í að tefja leikinn finnst mér. Sem er bara fínt, ég finn ekkert að því. En mér finnst að dómarinn megi þá stíga aðeins inn, það vantar smá flæði.''
Leikmenn hafa þurft að æfa öðruvísi og við fordæmalausar aðstæður vegna COVID-19 heimsfaraldursins, hvernig fannst Arnari líkamlegt ásigkomulag leikmanna?
„Það er fínt. Ég sagði alltaf að það tæki 2-3 leiki til þess að komast í gang aftur. Svo fáum við þessa bongóblíðu fyrir norðan og grasvöll fyrir okkur. Hvort sem fólki líkar betur eða verr þá erum við orðnir svolítið gervigraslið og það tekur á líkamann,'' sagði Arnar Gunnlaugsson.
Viðtalið má sjá í heild sinni í spilaranum hér að ofan.
Athugasemdir
