Neymar ólst upp við að horfa á ítalska boltann þegar margir af bestu leikmönnum heims voru þar.

„Ég held að Cristiano Ronaldo muni breyta ítalskri knattspyrnu til hins betra. Þetta verður aftur í sama gæðaflokki og ítalski boltinn sem ég horfði á sem krakki," sagði Neymar við Fox Sports.

„Ronaldo er stórkostlegur leikmaður. Hann er lifandi goðsögn og fótboltasnillingur.

„Ég er ánægður fyrir hans hönd. Ég held að þetta hafi verið erfið ákvörðun hjá honum en ég óska honum alls hins besta, nema gegn PSG."

Þá er Neymar harður á því að hann sé ekki á leið frá PSG í sumar. Honum líður vel í París þrátt fyrir háværa orðróma um að hann eigi að fylla í skarð Ronaldo hjá Real Madrid.

„Ég verð áfram í París, ég er samningsbundinn PSG. Þetta eru allt orðrómar sem fjölmiðlar búa til," hélt Neymar áfram.

„Allir vita hvers vegna ég fór til Parísar, ég vil vinna titla með félaginu og ég vona að næsta tímabil verði stórkostlegt."