Emre Can hefur verið gagnrýndur fyrir ummæli sín eftir leik Juventus og Valencia í Meistaradeildinni. Cristiano Ronaldo fékk beint rautt spjald snemma leiks fyrir að rífa í hárið á Jeison Murillo, varnarmanni Valencia, og er miðjumaðurinn ósammála brottrekstrinum.
Can sagði eftir leikinn að það væri ekki hægt að gefa rautt spjald fyrir að toga í hár, því þarna séu karlar á ferð en ekki konur.
„Ég vil taka smá stund til að hreinsa loftið varðandi ummæli mín eftir leikinn í gærkvöldi," segir í yfirlýsingu frá Can.
„Ég vil taka fram að ummælin mín voru á engan hátt sett fram til að gera lítið úr konum, kvennafótbolta eða jafnrétti. Ég vildi bara standa með liðsfélaga mínum sem þurfti að líða fyrir ranga dómaraákvörðun sem hefði getað eyðilagt leikinn okkar.
„Ég biðst innilegrar afsökunar ef eitthvað sem ég sagði fór fyrir brjóstið á einhverjum."
Athugasemdir
