Jói Berg: Gefur okkur helling að Everton sé líka þarna

Liðið er sem stendur á botninum en Jóhann Berg segir að næstu tveir leikir séu gríðarlega mikilvægir. Þá spilar Burnley við West Ham og Sheffield United á heimavelli. Hann segir jafnframt að stigafrádráttur Everton geti hjálpað liðinu en tíu stig voru tekin af Everton fyrir helgi þar sem félagið var talið brotlegt gagnvart fjármálareglum.

„Við eigum tvo heimaleiki núna og það eru gríðarlega mikilvægir leikir. Það er annað lið þarna sem er núna með fjögur stig og það gefur okkur helling að Everton sé líka þarna. Þetta er hörkubarátta en við verðum að fara að vinna einhverja leiki," sagði Jóhann Berg við Fótbolta.net í gær.

„Við höldum áfram að gera það sem við gerum. Við spilum ákveðna taktík og erum mikið að halda í boltann. Það eru margir leikmenn í liðinu sem hafa ekki áður spilað á þessu stigi og þurfa að læra það. Vonandi hafa þeir gert það núna þannig að við getum sett saman einhverja leiki."

„Þetta verður alvöru barátta, en við ætlum að halda okkur við það sem erum að gera. Það er ekkert paníkk hjá okkur, allavega ekki enn," sagði hann en viðtalið má sjá í heild sinni hér fyrir neðan.