England: 15 mínútum bætt við er Watford steinlá gegn Norwich

Watford er nú í fallsæti í ensku úrvalsdeildinni eftir leik við Norwich sem fór fram í kvöld.

Fyrir leikinn var Watford í 17. sæti deildarinnarm eð 14 stig og var Norwich sæti neðar með 13. Liðið vann Everton óvænt 2-1 í síðustu umferð.

Fyrri hálfleikurinn í kvöld var engin frábær skemmtun en fjörið hófst í þeim síðari er Norwich tók forystuna.

Bandaríkjamaðurinn Joshua Sargent skoraði fyrsta mark leiksins á 51. mínútu en hann afgreiddi þá fyrirgjöf Teemu Pukki frábærlega og boltinn í slá og inn.

Ekki löngu eftir það var gert um 12 mínútna hlé á leiknum þar sem rafmagnið sló að hluta til út og hafði það áhrif á flóðljós vallarins.

Að lokum var ákveðið að halda leik áfram þrátt fyrir þau vandræði og stuttu eftir þá ákvörðun var staðan orðin 2-0.

Sargent skoraði þá sitt annað mark fyrir Norwich og staðan óvænt orðin 2-0 fyrir gestunum.

Útlitið varð svo enn svartara fyrir Watford á 77. mínútu er Emmanuel Dennis fékk að líta sitt annað gula spjald og þar með rautt.

15 mínútum var bætt við venjulegan leiktíma og þriðja mark Norwich kom á 92. mínútu er varamaðurinn Juraj Kucka skoraði mjög klaufalegt sjálfsmark til að gulltryggja gestunum stigin þrjú.

Frábær útisigur Norwich staðreynd og lyftir liðið sér úr fallsæti og fyrir ofan Watford í 16. sætið.