Championship: Rooney skoraði í deildarleik númer 500

Wayne Rooney spilaði sinn fimmhundraðasta deildarleik á Englandi er Derby County tók á móti Fulham í Championship deildinni í kvöld.

Staðan var markalaus eftir fremur rólegan fyrri hálfleik en bæði lið skiptu um gír eftir leikhlé og úr varð spennandi viðureign.

Rooney skoraði úr vítaspyrnu á 55. mínútu og jafnaði Aleksandr Mitrovic stöðuna korteri síðar.

Hvorugu liði tókst að bæta marki við leikinn þrátt fyrir góðar marktilraunir og þurftu menn að sætta sig við jafntefli.

Fulham er áfram í þriðja sæti deildarinnar, tveimur stigum eftir Leeds sem á þó leik inni. Derby er um miðja deild, átta stigum frá umspilssæti.