England um helgina - Mourinho mætir á Brúnna

Dagurinn hefst á Lundúnaslag Chelsea og Tottenham sem fer fram á Stamford Bridge. Eitt stig skilur liðin að í Meistaradeildarbaráttunni þar sem Chelsea situr í fjórða sæti og Tottenham fimmta.

Jose Mourinho mætir aftur á Brúnna en lærisveinar hans töpuðu á heimavelli gegn RB Leipzig fyrr í vikunni.

Deginum lýkur svo á viðureign Leicester og Manchester City, sem eru í baráttu um annað sæti úrvalsdeildarinnar.

Man City er fjórum stigum á undan en það er svo gott sem ómögulegt fyrir liðin að ná toppliði Liverpool, sem er með ótrúlega 22 stiga forystu.

Jóhann Berg Guðmundsson er kominn úr meiðslum og er í leikmannahópi Burnley sem tekur á móti Bournemouth. Sá leikur fer fram á sama tíma og þrír aðrir leikir.

Á sunnudaginn á Wolves heimaleik við botnlið Norwich á sama tíma og Manchester United tekur á móti Watford.

Arsenal og Everton mætast svo í síðasta leik helgarinnar. Tvö stig skilja liðin að um miðja deild. Gylfi Þór Sigurðsson og félagar eru fyrir ofan, aðeins fimm stigum frá Meistaradeildinni.

27. umferð lýkur þó ekki fyrr en á mánudagskvöldið, þegar Liverpool fær West Ham í heimsókn.

Laugardagur:
12:30 Chelsea - Tottenham (Síminn Sport)
15:00 Sheffield Utd - Brighton
15:00 Southampton - Aston Villa
15:00 Crystal Palace - Newcastle
15:00 Burnley - Bournemouth
17:30 Leicester - Man City (Síminn Sport)

Sunnudagur:
14:00 Wolves - Norwich
14:00 Man Utd - Watford (Síminn Sport)
16:30 Arsenal - Everton (Síminn Sport)

Mánudagur:
20:00 Liverpool - West Ham (Síminn Sport)