Ítalía: Parma fór illa að ráði sínu gegn Udinese

Parma og Udinese áttust við í fyrsta leik dagsins í Serie A deildinni á Ítalíu.

Parma hefur gengið bölvanlega á þessu tímabili og er liðið í bullandi fallbaráttu á meðan Udinese er um miðja deild.

Heimamenn byrjuðu betur í kvöld og strax eftir þriggja mínútna leik skoraði Andreas Cornelius en þetta var hans fyrsta mark í langan tíma.

Juraj Kucka skoraði úr vítaspyrnu á 32. mínútu og staðan því mjög vænlega fyrir heimamenn í Parma. Udinese gafst hins vegar ekki upp.

Stefano Okaka Chuka gaf gestunum von með marki á 64. mínútu og það var svo Bram Nuytinck sem bjargaði stigi fyrir Udinese á 80. mínútu.

Hrikalegt hjá Parma að missa þennan leik niður í jafntefli og er liðið því áfram í nítjánda sæti deildarinnar.