Varnarmaðurinn Kyle McLagan verður áfram í herbúðum Fram á komandi leiktíð.
Jón Þórir Sveinsson, þjálfari Fram, sagði frá þessu í viðtali eftir 8-2 tap gegn KR í Lengjubikarnum í gær.
„Fred og Kyle eru bara að koma í næstu viku... við erum bara vel settir og erum bara að halda áfram þrátt fyrir allt í dag," sagði Jón í samtali við Fótbolta.net.
Kyle er bandarískur miðvörður sem gekk í raðir Fram á miðju tímabili í fyrra. Hann er 25 ára og spilaði með Roskilde í Danmörku áður en hann kom til Fram.
Hann spilaði átta leiki í Lengjudeildinni þegar Fram hafnaði í þriðja sæti deildarinnar. Mótinu var slaufað þegar Fram átti tvo leiki eftir en þeir voru með jafnmörg stig og Leiknir, sem hafnaði í öðru sæti, en slakari markatölu.
Athugasemdir