Víkingur R. mætti KR í Egilshöllinni í úrslitaleik A-deildar Lengjubikarsins.

Staðan var markalaus í hálfleik þótt að bæði lið hafi fengið færi til að komast yfir en Óskar Örn Hauksson kom KR-ingum yfir snemma í síðari hálfleik með skallamarki eftir laglega fyrirgjöf frá Valtý Má Michaelssyni.

Tíu mínútum síðar var Óskar Örn búinn að tvöfalda forystuna þegar hann fékk boltann gefins frá andstæðingi sínum á miðjunni áður en hann lét vaða á markið frá eigin vallarhelming, því Róbert Örn Óskarsson var ekki tilbúinn í marki Víkinga og tókst ekki að verja langskotið hnitmiðaða.

KR-ingar sáu leikinn frekar auðveldlega til loka þar sem þeir hleyptu Víkingum ekki nálægt sér og verðskulduðu sigurinn.