„Það er ekki bara hvalreki fyrir okkar félag og leikmenn heldur fyrir íslenska knattspyrnu," sagði Arnar Gunnlaugsson þjálfari Víkings við Fótbolta.net í dag eftir að Kári Árnason gekk í raðir félagsins.
„Deildin er búin að vera mjög skemmtileg í sumar. Hans nafn mun bæta ofan á það. Þetta tímabil erum við með mikið af ungum og góðum leikmönnum sem eiga möguleika á að komast í atvinnumennsku og það er besta mál að leikmaður eins og Kári með Víkingshjarta skuli koma að hjálpa okkur í þeirri baráttu."
„Leikmenn geta svo sannarlega lært af honum, hvernig hann hagar sér á æfingum og í leikjum. Þetta er alvöru atvinnumaður sem er ennþá í toppstandi svo hann er ekki að koma heim til að deyja. Þetta er gríðarlegur styrkur fyrir okkur."
Kári var frábær í sigurleikjum íslenska landsliðsins gegn Albaníu og Tyrklandi í byrjun mánaðarins en kemur nú heim í Víking. En setur koma hans meiri pressu á Arnar?
„Okkur var spáð falli enda vissu menn ekki hvernig hópurinn yrði samansettur í lokin. Við vorum með góðan hóp en erum með ennþá betri hóp í dag. Við höfum spilað 8 leiki í deildinni og allir hafa verði hörkuleikir."
Kári er miðvörður en spilaði snemma á ferlinum sem miðjumaður einnig. Fyrir er hjá félaginu Sölvi Geir Ottesen sem spilaði með honum í upphafi ferilsins og einn leik með landsliðinu.
„Fyrir mér er Kári hafsent. Ég er ekki hrifinn af því að búa til aðra stöðu fyrir leikmenn sem eru bestir á landinu í sinni stöðu til að hliðra til. Ég hef ekki skilið þá pælingu. Hann er hafsent fyrir mér hvort sem það væri í tveggja eða þriggja hafsenta vörn."
Athugasemdir