Þróttur R var ótrúlega nálægt því að vinna sinn fyrsta sigur í Lengjudeild Karla þegar þeir fengu Fram í heimsókn í kvöld. Leikurinn endaði með jafntefli, 2-2, og var jöfnumark Fram sjálfsmark í uppbótartíma. Gunnar Guðmundsson þjálfari var eðlilega gríðarlega svekktur eftir leik.
Lestu um leikinn: Þróttur R. 2 - 2 Fram
Gunnar var mjög ósáttur með Kristinn Friðrik Hrafnsson dómara leiksins í lokin en Gunnar vildi meina að uppbótartímininn væri liðinn þegar jöfnunarmarkið kemur.
„Uppbótartíminn var liðinn þegar hann dæmir hornspyrnu og svo eftir fyrri hornspyrnuna þá eru komnar yfir tvær mínútur í uppbótartíma þannig að leikurinn var löngu búinn þegar þeir fá seinni hornspyrnuna''.
Það var allt annað að sjá til Þróttar í þessum leik heldur en í síðustu umferð og Gunnar var ánægður með spilamennskuna.
„Við áttum góðan leik í dag og börðumst vel, hefðum átt sigurinn skilið en því miður, það datt ekki með okkur í þetta skipti frekar en önnur''.
Oliver Heiðarsson kom inn á í hálfleik hjá Þrótturum og gaf liðinu mikinn kraft. Oliver lagði meðal annars upp bæði mörk liðsins og var mjög líflegur. Gunnar var ánægður með hann og liðið í heild.
„Oliver kom mjög flottur inn í seinni hálfleik og ég var í raun ánægður með allt liðið. Baráttan, vinnusemin, dugnaðurinn, þetta var allt til staðar í dag og þetta er það sem við viljum sjá. Við erum með gott lið og við getum spilað fótbolta. Það hefur vantað aðeins upp á þetta hjá okkur. Ef menn mæta svona í fleiri leiki þá förum við að taka fleiri stig það er alveg á hreinu''.
Þróttur á gríðarlega erfiðan leik í næstu umferð en þá mæta þeir ÍBV á útivelli. Spilamennska liðsins í dag hlýtur að gera Gunnar aðeins bjartsýnni fyrir þann leik?
„ÍBV er með hörkulið og eru búnir að standa sig vel í sumar, eru á toppnum. Fyrir okkur er þetta bara eins og hver annar leikur. Við teljum okkur alveg geta farið til Eyja og sótt eitthvað. Við mætum alveg óhræddir þangað en það verður erfiður leikur og hörkuleikur og við gerum okkur grein fyrir því, en bara spennandi verkefni''.
Athugasemdir