„Það er ógeðslega gaman að fá svona sterkt Valslið á heimavöllinn okkar og rústa þeim eiginlega,“ sagði markahrókurinn Sveindís Jane Jónsdóttir eftir magnaðan 4-0 sigur á Val í kvöld.
Lestu um leikinn: Breiðablik 4 - 0 Valur
Blikar gerðu nánast út um leikinn með tveimur mörkum strax í upphafi síðari hálfleiksins.
„Við ætluðum að koma af miklum krafti inn í seinni hálfleikinn og keyra á þær. Það er svo gott að fá mark svona í byrjun seinni hálfleiks. Það breytti alveg öllu,“ sagði Sveindís en eftir að hafa náð svona góðri forystu gátu Blikar legið til baka en um leið haldið áfram að ógna með skyndisóknum enda með gríðarlega öfluga leikmenn fremst á vellinum.
„Við vinnum leikinn eiginlega á þessum tveimur mörkum. Við vorum ótrúlega rólegar í vörninni og spiluðum ótrúlega vel og uppskárum fjögur mörk.“
Sveindís fór sjálf á kostum í leiknum og skoraði þrjú fyrstu mörk Breiðabliks. Þar með gerði hún sína fyrstu þrennu í efstu deild og var eðlilega kampakát með það.
„Það er geggjað og sérstaklega á móti svona góðu liði. Það var ótrúlega gaman að skora þessa þrennu,“ sagði Sveindís sem lýsti mörkunum sínum á heldur mínimalískan máta.
„Þau voru fín. Ekkert eitthvað stórkostleg. Ég bara lagð‘ann.“
Nánar er rætt við sóknarmanninn unga og öfluga í spilaranum hér að ofan.
Athugasemdir