Vinasamband Cavani og Neymar hjá PSG fór ekkert sérstaklega vel af stað en þeir rifust um að taka vítaspyrnu gegn Dijon á síðasta tímabili sem endaði með pirringskasti frá Neymar.

Mikið var rætt og ritað um málið en það hefur nú aftur ratað í fjölmiðla eftir brot Cavani á Neymar í vináttulandsleik milli Brasilíu og Úrúgvæ í vikunni.

Neymar féll þá til jarðar og virkaði afar pirraður út í Cavani en úrúgvæski framherjinn er orðinn þreyttur á að fjölmiðlar spyrji endalaust út í þetta málefni.

„Neymar? Þið verðið að hætta þessu. Þið fjölmiðlarnir eruð að skapa eitthvað úr engu," sagði Cavani.

„Fyrir utan fótboltann lifir fólk sínu lífi og innan fótboltans vinnum við allir saman að sömu markmiðum," sagði hann í lokin.