Shevchenko var í viðtali á Sport Mediaset í dag og lýsti þar yfir aðdáun sinni að Krzysztof Piatek sem gerði sigurmark Pólverja gegn Austurríki í undankeppni EM í gærkvöldi.

Piatek hefur verið frábær í ítalska boltanum á tímabilinu og fór frá Genoa til Milan í janúar. Hann skoraði nánast í hverjum leik hjá Genoa og heldur uppteknum hætti hjá Milan þar sem hann er kominn með 8 mörk í 10 leikjum.

„Piatek er arftaki minn, það er engin spurning. Hann skorar alvöru framherjamörk og er með þessa eðlishvöt sem helstu markaskorarar heims þurfa að hafa," sagði Shevchenko.

„Hann getur skotið með báðum fótum og er góður í loftinu. Með hann í fararbroddi getur Milan náð sér í Meistaradeildarsæti."