Fótbolti.net

mán 22. apríl 2024 12:36

Elvar Geir Magnússon

Chelsea verður án síns langbesta leikmanns gegn Arsenal

Cole Palmer.

Mynd: EPA

Thiago Silva.

Mynd: EPA

Það verður stórleikur í ensku úrvalsdeildinni annað kvöld þegar Arsenal og Chelsea eigast við. Arsenal er í harðri baráttu um enska meistaratitilinn.

Stuðningsmenn Arsenal eru ánægðir með að Chelsea verður að öllum líkindum án síns langbesta leikmanns á tímabilinu, Cole Palmer sem hefur raðað inn mörkum.

Palmer er veikur og gat ekki æft með Chelsea í dag. Mauricio Pochettino stjóri liðsins býst ekki við því að hann geti spilað annað kvöld.

„Ég tel að Palmer geti ekki tekið þátt í leiknum. Við sjáum stöðuna á morgun en í dag reikna ég ekki með honum. Þrátt fyrir að hann verði mögulega orðinn betri á morgun þá verður hann kannski ekki í ástandi til að spila," segir Pochettino.

„Hvort sem við verðum með hann eða án hans þá teljum við okkur geta unnið þennan leik. Að sjálfsögðu er hann frábær leikmaður og staðið sig stórkostlega en þetta snýst um liðsheildina."

Malo Gusto og Ben Chilwell eru að glíma við meiðsli og gátu heldur ekki æft í dag.

Jackson er að gera ótrúlega góða hluti
Nicolas Jackson fór illa með góð tækifæri um helgina þegar Chelsea tapaði gegn Manchester City í undanúrslitum FA-bikarsins.

„Fyrsta tímabilið er alltaf krefjandi fyrir leikmenn, sérstaklega sóknarmenn sem þurfa að standa sig og skora mörk. Það er gerð krafa um að hann skori með hverri snertingu. Hann er okkar aðalsóknarmaður, okkar eini sóknarmaður sem er heill," segir Pochettino.

„Jackson er að gera ótrúlega góða hluti fyrir liðið, hleypur, skorar og á stoðsendingar. Hann er ungur leikmaður sem kom úr spænsku deildinni og hefur staðið sig vel. Hann er með allan minn stuðning, jafnvel þó hann skori ekki alltaf. Hann verður klárlega betri á næsta tímabili. Hann verður bara að halda áfram."

Ekki tímapunktur til að ræða framtíð Silva
Thiago Silva, hinn reynslumikli brasilíski miðvörður, verður samningslaus í sumar. Silva verður 40 ára í september.

„Eftir leikinn um helgina sagði hann að það væri ekki rétti tímapunkturinn til að ræða málin. Þegar hann vill ræða málin þá verður það gert. Sem stendur eru ekki viðræður í gangi, við vorum að spila undanúrslitaleik og stefnum á að enda eins ofarlega í deildinni og mögulegt er," segir Pochettino.

		L	U	J	T	ms:	mf:	mun	Stig
1	Liverpool	25	18	6	1	60	24	+36	60
2	Arsenal	25	15	8	2	51	22	+29	53
3	Nott. Forest	25	14	5	6	41	29	+12	47
4	Man City	25	13	5	7	52	35	+17	44
5	Bournemouth	25	12	7	6	44	29	+15	43
6	Chelsea	25	12	7	6	47	34	+13	43
7	Newcastle	25	12	5	8	42	33	+9	41
8	Fulham	25	10	9	6	38	33	+5	39
9	Aston Villa	25	10	8	7	35	38	-3	38
10	Brighton	25	9	10	6	38	38	0	37
11	Brentford	25	10	4	11	43	42	+1	34
12	Tottenham	25	9	3	13	49	37	+12	30
13	Crystal Palace	25	7	9	9	29	32	-3	30
14	Everton	25	7	9	9	27	31	-4	30
15	Man Utd	25	8	5	12	28	35	-7	29
16	West Ham	25	7	6	12	29	47	-18	27
17	Wolves	25	5	4	16	35	54	-19	19
18	Ipswich Town	25	3	8	14	23	50	-27	17
19	Leicester	25	4	5	16	25	55	-30	17
20	Southampton	25	2	3	20	19	57	-38	9