„Þegar ég er að labba framhjá stúkunni er hiti við völlinn og í göngunum. Hvað gerðist?," spyr Sæbjörn Þór Þórbergsson í þættinum.

Aksentije Milisic, hinn umsjónarmaður þáttarins, svarar:

„Eftir að Steinþór skorar er Hákon markvörður Gróttu að sparka upp vítateiginn. Á meðan er boltinn hinumegin á vellinum. Hvort það hafi verið pirringur í honum eða eitthvað, ég veit það ekki."

„Mér fannst þetta barnaleg hegðun. Hann var bara að eyðileggja vítateiginn. Gunni Nella og fleiri sem voru þarna nálægt voru að láta hann heyra það. Ég veit ekki hvað gerist í göngunum svo en það fóru einhver orð á milli. Mér finnst þetta mjög barnalegt og það voru alvöru læti."

„Hákon var að fá einhverjar pillur á Facebook síðu KA, það var ekki verið að tala fallega um hann," segir Aksentije.

Sæbjörn bætir við að þetta hafi nú ekki hjálpað Greifavellinum sem hafi ekki verið góður fyrir, eins og mikið hefur verið fjallað um.

KA vann þarna sinn fyrsta sigur þetta tímabilið en nýliðar Gróttu eru í fallsæti. Hægt er að hlusta á þáttinn í spilaranum hér að neðan eða í gegnum Podcast forrit.