Enn hafa engar vísbendingar fundist um afdrif flugvélarinnar sem innihélt argentínska fótboltamanninn Emiliano Sala og breska flugmanninn Dave Ibbotson.

Leit hefur verið hætt í dag þar sem sólin er sest. Snemma á morgun verður fundað og tekin ákvörðun um hvert framhaldið verður. Guardian segir að talað sé um að hætta leit.

Leitaraðilar telja að engin von sé um að Sala og Ibbotson finnist á lífi.

„Það er mitt persónulega mat að vonin sé engin. Því miður, það tel ég. Á þessum árstíma eru aðstæður þarna hrikalegar ef þú ert ofan í sjónum," segir John Fitzgerald, einn af þeim sem stýra leitinni.

Talið er víst að flugvélin hafi hrapað ofan í Ermarsund á mánudagskvöld þegar hún var á leið frá Frakklandi til höfuðborgar Wales.

Cardiff City, sem var nýbúið að kaupa Sala, hefur gefið út að félagið skipulagði ekki flugið en það mun hafa verið í höndum umboðsmannsins Willie MacKay sem einnig sá um sölu Sala frá Nantes til Cardiff.