Þýskaland og Svíþjóð mættust í kvöld í lokaleik dagsins á Heimsmeistaramótinu í Rússlandi, með sigri Svíþjóðar hefði Þýskaland verið úr leik.

Staðan var ekki góð fyrir Þjóðverja í hálfleik því Svíþjóð var með eins marks forystu þegar flautað var til loka fyrri hálfleiks.

Þjóðverjar misstu þá boltann á miðjum vellinum og Svíþjóð fór í sókn, sem endaði með því að Viktor Claesson sendi boltann á Ola Toivonen sem afgreiddi boltann snyrtilega í netið.

Þjóðverjar byrjuðu seinni hálfeikinn vel og náðu að jafna strax í upphafi seinni hálfeiks en Marco Reus kom þá boltanum í netið eftir sendingu frá Mario Gomez. Þjóðverjar misstu svo mann af velli með rautt spjald á 82. mínútu en Jerome Boateng fékk þá sitt annað gula spjald.

Það var svo á 95. mínútu sem Toni Kross skoraði frábært mark eftir aukaspyrnu við vítateig Svíþjóðar, magnaður sigur Þjóðverja sem setur þá í nokkuð góða stöðu fyrir lokaumferðina.

Lokatölur í viðureign Þýskalands og Svíþjóðar, 2-1 sigur Þýskalands þar sem sigurmarkið kom undir lok leiksins.