„Við vorum ekki alveg í taktinum til að byrja með en náðum svo tökum á boltanum. Það sem ég óánægðastur með er að við vorum alltof berskjaldaðir varnarlega. Ég er ósáttur við að það sem einkennir okkur hafi brugðist," sagði Óli Stefán þjálfari KA eftir 3-4 tap gegn Víking R. á Greifavellinum í dag.
Lestu um leikinn: KA 3 - 4 Víkingur R.
KA jafnaði tvisvar leikinn en Víkingur setti fjögur mörk.
„Ef þú færð á þig 3-4 mörk þá er mjög erfitt að ætla að fá eitthvað út úr leiknum. Það er eitthvað sem við verðum fyrst og fremst að horfa í."
KA gerði vel sóknarlega og Óli Stefán var ánægður með það.
„Við verðum að horfa í það jákvæða. Við verðum að halda áfram. Þetta er allt saman risastór skóli. Sóknarleikur var fínn hjá okkur á köflum, fáum frábærar stöður og færi og gerum tilkall í tvö víti sem er svo sem önnur saga en það verðum við að taka með okkur áfram."
Dómari leiksins var með nokkra umdeilda dóma í dag.
„Það koma upp tvær stöður þar sem hann sleppir því að dæma og dæmir svo mjög vafasamt víti á okkur. Auðvitað erum menn svekktir og vilja svör sem við fáum bara ekki. Við verðum samt aðallega að horfa á okkur sjálfa og fara yfir það sem fór úrskeiðis."
KA er í áfram í 5. sæti með 12 stig. Deildin er virkilega þétt.
„Þetta er skemmtileg deild og jafnir leikir allt saman. Við verðum bara á fókusa á næsta leik. Við töpum núna heimaleik og það þýðir að við verðum að fara á útivöll og sækja sigur til að leiðrétta það. Við eigum einmitt útileik í næsta leik og ágætt að byrja bara þar."
Viðtalið má sjá í heild sinni hér að ofan.
Athugasemdir