Sæþór Ívan Viðarsson kom Leikni yfir seint í fyrri hálfleiknum og var staðan 1-0 alveg fram á 93. mínútu. Þá jafnaði Frans Elvarsson, eftir að Arek Grzelak, varnarmaður Leiknis, hafði fengið að líta rauða spjaldið.

Leiknismenn voru ekki par sáttir við dómgæsluna í leiknum og skrifar Jón Bragi Magnússon, sem var allan tímann á varamannabekknum í gær, á Twitter: „Alvöru uppistand hjá dómaratríóinu í höllinni í kvöld. Ömurleg frammistaða."

Valdimar Pálsson dæmdi leikinn og fékk 3,5 í einkunn frá Fannari Bjarka Péturssyni, fréttaritara Fótbolta.net, fyrir dómgæsluna.

„Valdimar var ekki samkvæmur sjálfum sér og dæmdi seinni hálfleikinn sérstaklega illa fannst mér. Var ágætur í þeim fyrri en í seinni missti hann öll tök og fannst mér það bitna á heimamönnum sem voru dæmdir brotlegir fyrir litlar sem engar sakir trekk í trekk á meðan Keflvíkingar voru aldrei dæmdir brotlegir fyrir álíka brot og Leiknismenn voru ítrekað dæmdir fyrir. Einnig fékk Arek Jan að líta rauða spjaldið sem að mér skilst hafi ekki verið sanngjarnt þar sem Arek var að reyna fá útskýringar frá Valdimari sem gaf honum seinna gula og þar með rautt, og Leiknismenn verða án fyrirliða síns í næsta leik í Ólafsvík sem er högg fyrir þá," skrifaði Fannar Bjarki.

Hér að neðan má sjá færslu Jóns Braga.