Grindavík fór norður á Akureyri og töpuðu 4-3 í hörku knattspyrnuleik á Greifavellinum í næst síðustu umferð Pepsí-deildar karla í dag. Óli Stefán Flóventsson þjálfari Grindvíkinga sagði að liðið hefði byrjað þennan leik alveg hræðilega en spilað vel eftir það.
Lestu um leikinn: KA 4 - 3 Grindavík
„Eftir að við fáum á okkur þessi fjögur mörk í fyrri hálfleik þar sem við drullum all hressilega í brækurnar þá var ég nokkuð ánægður með hvernig leikurinn spilaðist eftir það. Við urðum sjálfum okkur líkir en afskaplega dapurt að byrja þetta svona illa."
Óli er að hætta með liðið eftir tímabilið og segist að sjálfsögðu vilja klára tímabilið á sigri í síðasta leik.
„Ég er búinn að eiga góða tíma síðustu fjögur ár í Grindavík og minn fókus er á að klára þetta tímabil með sæmd. Við viljum keyra einn sigur inn og enda þetta á góðu nótunum heima í Grindavík."
Mikið hefur verið rætt um að Óli Stefán taki við KA eftir tímabilið en hann vildi ekki ræða það eftir leik af virðingu við félagið sitt.
„Ég vil ekki ræða það, ég á rosalega erfitt með að tala um það af virðingu við félagið mitt þar sem ég er ennþá í vinnu. Ég bíð með að tala um það þar til eftir tímabilið. Ég er atvinnulaus eftir viku og hvort sem það er KA eða eitthvað annað þá fer ég í það þegar tímabilinu lýkur."
Athugasemdir