Gallagher og Sky tóku viðureign Manchester City gegn Burnley sérstaklega fyrir eftir þessa helgi þar sem dómari leiksins virðist hafa gerst sekur um tvö stór mistök.

Önnur mistökin eru að annað mark City í leiknum átti ekki að standa vegna rangstöðu. Hin mistökin eru þau að Vincent Kompany fékk að klára leikinn með gult spjald.

Kompany var spjaldaður fyrir háskaleik, þar sem hann endaði á að setja takkana í lærið á Aaron Lennon sem þurfti að láta sauma lærið saman.

„Kompany átti að fá rautt spjald. Hann fer með fótinn alltof hátt, kemur alltof seint í tæklinguna og á aldrei séns í boltann," segir Gallagher.

„Ég er ekki að segja að hann hafi gert þetta viljandi, en þetta átti að vera rautt spjald."