Besta deildin: Jannik og Gummi Magg afgreiddu FH

Það var einn leikur á dagskrá í neðri helming Bestu deildar karla í dag en þar áttust við Fram og FH á Framvellinum.

Frammararnir voru á skotskónum í dag en ekki FH þrátt fyrir að gestirnir hafi átt nóg af færum til að skora mark í dag.

Leiknum lauk með 3-0 sigri Fram þar sem Jannik Holmsgaard gerði tvennu og Guðmundur Magnússon skoraði eitt.

Guðmundur var þarna að jafna Nökkva Þey Þórisson í baráttunni um gullskóinn en þeir eru báðir komnir með sautján mörk á þessari leiktíð. Nokkuð er síðan Nökkvi fór út í atvinnumennskuna.

Með sigrinum fer Fram yfir ÍBV og í áttunda sæti deildarinnar en FH mun enda í þriðja neðsta sætinu á þessari leiktíð.