Wolves skellti Arsenal er liðin mættust í ensku úrvalsdeildinni í kvöld. Arsenal hélt boltanum vel en skapaði afar lítið á meðan Úlfarnir voru stórhættulegir í skyndisóknum sínum og varnarleikur Arsenal hörmulegur.

Ruben Neves kom Úlfunum yfir með marki beint úr aukaspyrnu og tvöfaldaði Matt Doherty forystuna með skallamarki eftir fyrirgjöf sem kom í kjölfar stuttrar hornspyrnu.

Diogo Jota náði að koma þriðja markinu í netið fyrir leikhlé. Það kom eftir slæma sendingu Granit Xhaka fyrir aftan miðju. Jota fékk boltann og labbaði framhjá Henrikh Mkhitaryan og Sokratis Papastathopoulos áður en hann skoraði framhjá Bernd Leno, sem hefði getað gert betur.

Unai Emery breytti um leikkerfi á 60. mínútu en það skilaði ekki sérlega miklu. Lið Arsenal varð stabílla en sóknarleikurinn skánaði ekki. Sokratis náði þó að skora eftir hornspyrnu Xhaka en niðurstaðan sanngjörn, 3-1 fyrir Wolves.

Úlfarnir eru komnir í sjöunda sæti deildarinnar eftir sigurinn. Þetta var annar tapleikur Arsenal í röð og situr liðið áfram í fimmta sæti, einu stigi eftir Chelsea.