„Fyrst að UEFA hefur sett þessa reglu varðandi Evrópusæti, gætum við ekki séð ensku úrvalsdeildina nota þetta ef deildinni verður aflýst? Krýna Liverpool meistara samkvæmt þessu og Norwich, Aston Villa og Bournemouth falla. Ég gæti séð ensku deildina taka sama pól í hæðina," sagði Elvar Geir Magnússon í útvarpsþættinum Fótbolti.net.

„Þarna standa allir jafnfætis. Þetta er bara meðalfjöldi stiga og er heiðarlegasta leiðin," sagði Tómas Þór Þórðarson sem telur þetta vera sanngjörnustu leiðina ef deildinni yrði aflýst.

Ef ensku úrvalsdeildinni verður aflýst munu Liverpool, Manchester City, Leicester og Chelsea þá fara í Meistaradeildina samkvæmt þessari reglu. Öll eru þau þegar í topp fjórum.

Manchester United og Sheffield United fá þá bein sæti inn í Evrópudeildina.

Sheffield United er fyrir aftan Wolverhampton Wanderers á markatölu en Úlfarnir eru búnir að leika leik meira og Sheffield því með fleiri stig að meðaltali í leik.

Ef tímabilinu er aflýst fer Wolves í forkeppni Evrópudeildarinnar en Lundúnaliðin Arsenal og Tottenham missa af Evrópusæti.

Ef þessi regla verður notuð til að ákveða úrslit deildarinnar þá mun Liverpool fá titilinn en Norwich City, Aston Villa og Bournemouth falla. Liðin sem þegar eru í fallsæti.

En ef Evrópubann Manchester City mun standa þá myndi Manchester United fara upp í Meistaradeildarsæti, Wolves og Sheffield United beint í Evrópudeildina og Arsenal í forkeppni Evrópudeildarinnar.