„Mér fannst leikurinn mjög góður en erfiður,“ sagði Linda Líf Boama sem átti frábæran leik þegar Þróttur sigraði Tindastól 4-2 í Inkasso-deild kvenna í kvöld. Eftir leiki kvöldsins eru Þróttarar áfram á toppi deildarinnar með fullt hús stiga eftir þrjár umferðir.
Lestu um leikinn: Þróttur R. 4 - 2 Tindastóll
Þegar Linda Líf var spurð að því hvort að öflug byrjun Þróttar kæmi henni á óvart var svarið skýrt nei.
„Nei, við erum mjög skipulagðar og erum með frábært teymi á bakvið okkur. Þetta er bara eftir plani.“
Sjálf hefur Linda Líf farið vel af stað í markaskorun og er komin með 5 mörk í þremur fyrstu leikjum. Aðspurð vildi hún þó lítið gefa upp um markmið sín í markaskorun.
„Nei, ég get ekki sagt það. Ég tek einn leik í einu og við vinnum saman sem lið. Skorum sem lið. Það er ekkert að marka hver skorar.“
Það hefur verið gaman að fylgjast með samvinnu framherjanna Lindu Lífar og Lauren Wade en þær eru báðar nýliðar hjá Þrótti. Linda Líf segir njóta þess að spila með Lauren og læra af henni.
„Ég er mjög heppin að hafa hana með mér. Hún er mjög reynslumikil og hefur hjálpað mér mjög mikið. Það er mjög þægilegt að spila með henni.“
Hægt er að horfa á allt viðtalið við Lindu Líf í spilaranum hér að ofan.
Athugasemdir