Grótta er um miðja deild í Lengjudeildinni, en í liðinu eru frambærilegir leikmenn sem hafa vakið áhuga hjá félögum í efstu deild.

Þar fremstur á meðal jafningja er sóknarmaðurinn Pétur Theódór Árnason sem er markahæstur í Lengjudeildinni með tíu mörk í sjö leikjum. Stjarnan reyndi að fá hann fyrir mót en Grótta vildi ekki selja hann þá. Pétur er samningsbundinn Gróttu út næstu leiktíð.

„ÍBV og Fjölnir eru ekki að fara að láta neinn frá sér, örugglega ekki Grindavík..." sagði Tómas Þór Þórðarson.

„Kristófer Orri Pétursson (miðjumaður í Gróttu) er klárlega leikmaður sem hægt er að nota í efstu deild. Grótta gæti verið í brasi í glugganum, með að halda mönnum. Það er auðveld bráð því þeir eru ekki að fara að gera neitt en þeir eru samt með flotta stráka."

Pétur Theódór skoraði gegn HK í bikarnum í gær eftir að hafa komið inn á sem varamaður. Ágúst Gylfason, þjálfari Gróttu, var spurður út í Pétur eftir leikinn.

„Hann er frábær leikmaður, skorar í dag og er búinn að skora tíu mörk í deildinni. Það kveikir áhuga hjá öðrum félögum, hvort sem það er erlendis eða hér heima. Hann er frábær leikmaður," sagði Gústi.