Hin endalausa saga um De Jong virðist vera að taka enda en Hollendingurinn er reiðubúinn að vera áfram hjá Barcelona þrátt fyrir mikinn áhuga frá Manchester United.

United hefur verið í viðræðum við Barcelona síðustu vikur um kaup á De Jong en enska félagið hefur þó ekki náð að sannfæra hann um að koma.

Barcelona skuldar De Jong 17 milljónir evra í laun og er hann ekki eini leikmaðurinn sem á inni laun hjá félaginu. Barcelona heldur samt áfram að eyða háum fjárhæðum í leikmannakaup en það virðist engu máli skipta.

De Jong er fastur á því að vera áfram hjá Barcelona og segir nú AS að Xavi, þjálfari Börsunga, hafi beðið De Jong um að taka á sig helmings launalækkun, ef hann ætlar að vera áfram hjá félaginu og er De Jong opinn fyrir þeirri hugmynd.

Hann vill frekar taka því en að fara til Manchester United. De Jong er ekki sagður hrifinn af þeirri hugmynd að búa í Manchester og er ekki sannfærður um eigendur félagsins.

De Jong tók á sig 12 prósent launalækkun þegar Covid-faraldurinn var í gangi til að hjálpa spænska félaginu í gegnum erfiðan rekstur en hún tekur hann á sig enn eina launalækkunina og fer úr því að þéna 12 milljónir evra í árslaun í aðeins sex milljónir á ári.