„Ég vonaðist til þess að það myndi jafna sig í sumarfríinu en þegar ég byrjaði að æfa hjá Augsburg eftir fríið var ég lítið skárri. Var því ákveðið að taka mig aðeins til hliðar og reyna að vinna í þessu. Ég vonast eftir því að ég geti byrjað að æfa á ný með liðinu um miðjan september eða seinni hluta september," sagði Alfreð við Morgunblaðið.

Hann missir af fyrstu leikjum Augsburg í þýsku deildinni en þar er hann algjör lykilmaður og miklar kröfur gerðar til hans.

„Sjálfur býst ég við miklu af mér en fyrst og fremst myndi ég vilja vera heill á þessu tímabili. Ég hef verið nokkuð óheppinn varðandi meiðsli síðustu tvö tímabilin. Mér gekk hrikalega vel fyrir jól í fyrra og þá leit þetta vel út. Eftir jól kom hrina meiðsla, sem var mjög leiðinlegt því allt stefndi í frábært tímabil. En þegar sóknarmaður skorar meira en 10 mörk í svo sterkri deild er það mjög jákvætt þótt ég geri mér grein fyrir því að þau hefðu orðið fleiri ef ég hefði náð að spila fleiri leiki."

Eins og áður sagði verður landsliðshópurinn opinberaður 13:15 í dag. Fastlega má gera ráð fyrir því að landsliðsfyirirliðinn Aron Einar Gunnarsson verði fjarri góðu gamni líkt og Alfreð. Aron hefur ekki getað spilað með Cardiff í upphafi tímabils og þá á hann von á sínu öðru barni á næstunni.