Ingvar Jónsson.
Ingvar Jónsson og félagar hans í Viborg munu leika í umspili um sæti í dönsku úrvalsdeildinni.
Viborg vann öruggan 4-0 sigur gegn Fremad Amager í lokaumferð dönsku B-deildarinnar í dag. Ingvar stóð á milli stanganna hjá Viborg í leiknum.
Viborg hafnar í öðru sæti deildarinnar, einu stigi á eftir Silkeborg. Viborg fer því í umspil og mætir þar Hobro í tveggja leikja einvígi um sæti í dönsku úrvalsdeildinni.
Frederik Schram var á varamannabekknum hjá Roskilde sem tapaði 3-1 á útivelli gegn HB Køge. Roskilde endar í níunda sæti deildarinnar og verður áfram í B-deildinni.
Frederik mun yfirgefa Roskilde í sumar eftir þrjú ár hjá félaginu.
Frederik Schram er 24 ára og á fimm A-landsleiki fyrir Ísland. Hann var í landsliðshópnum sem fór á HM í Rússlandi á síðasta ári.
Athugasemdir
