Argentínski þjálfarinn Mauricio Pochettino verður látinn fara í næstu viku en Nasser Al-Khelaifi, forseti félagsins, mun tilkynna nokkrar breytingar í næstu viku.

PSG framlengdi við Kylian Mbappe á dögunum og gerði hann þriggja ára samning. Hann fær meiri völd innan félagsins og mun fá atkvæði þegar það kemur að því að fá nýja leikmenn, þjálfara og yfirmann íþróttamála.

Luis Campos mun taka við sem yfirmaður íþróttamála en Mbappe vann með honum hjá Mónakó. Ósk Mbappe var þá að fá Zinedine Zidane til að taka við keflinu af Pochettino.

PSG mun næstu daga halda viðræður við Zidane en félagið er reiðubúið að bjóða honum 25 milljónir evra í árslaun.

Zidane er ekki alveg sannfærður en frönsku blöðin segja að hann sé að bíða eftir því að Didier Deschamps hætti með franska landsliðið. Samningur hans rennur út eftir HM í Katar og eru líkur á því að það verði síðasta mótið sem hann stýrir liðinu.