„Það jákvæða er að á þessum tímapunkti eru margir ungir strákar sem aldrei hafa fengið að æfa með meistaraflokki að fá sínar fyrstu mínútur og að prófa sig á móti bestu liðum landsins. Ég er ekkert niðurdreginn en þetta var samt vont tap," sagði Srdjan Tufegdzic þjálfari Grindavíkur eftir 5-0 tap gegn Breiðabliki í Fótbolta.net mótinu í dag.
Hann tók við liðinu í vetur af Óla Stefán Flóventssyni sem tók við hans gamla starfi hjá KA. Nú er fyrsta árið komið af stað.
„Ég er búinn að vera ánægður með æfingarnar og þeir leikir sem við höfum spilað hingað til hafa verið mjög fínir og stígandi í þessu. Tapið í dag breytir engu af því sem við erum að vinna í, það vantar fullt af strákum í liðið í dag."
Grindavík hefur misst marga sterka leikmenn frá í fyrra og styrkt sig með þremur Marc McAusland sem kom frá Keflavík auk tveggja sem koma erlendis frá. (listann yfir komna og farna má sjá neðst í fréttinni). Túfa segist vera að vinna í að styrkja liðið enn frekar.
„Við erum að vinna á fullu í að styrkja liðið. Þessir leikmenn sem eru að koma að utan eru ekki komnir og ekki heldur nokkrir erlendir leikmenn sem voru í fyrra," sagði hann.
„Ég get ekki sagt hvað ég mun fá marga leikmenn til viðbótar. Við erum búnir að missa sex leikmenn frá í fyrra og fá þrjá til okkar. Það er planið að vera á pari en ekkert sem ég get sagt frá núna."
Túfa tók við liðinu í vetur og ljóst að liðið verður mikið breytt frá síðustu leiktíð. Hann var spurður út í breytt hlutverk frá KA starfinu þar sem mikið var lagt í uppbyggingu en hjá Grindavík virðist annað uppi á teningunum.
„Þegar ég kem hingað til Grindavíkur er ég að byrja alveg upp á nýtt, setja saman nýtt þjálfarateymi fyrst og byggja svo liðið upp. Ég vissi hvernig þetta verkefni yrði og að það yrði erfitt. Ég er mjög bjartsýnn á það og hef mikla trú á strákunum sem eru í kringum þetta."
Komnir:
Josip Zeba frá HAGL
Marc McAusland frá Keflavík
Vladan Djogatovic frá Serbíu
Farnir:
Björn Berg Bryde í Stjörnuna
Brynjar Ásgeir Guðmundsson í FH
Kristijan Jajalo
Sam Hewson í Fylki
Sito til Bandaríkjanna
Athugasemdir