„Ég er að búast við nokkuð miklu. Við þurftum að bæta við í sóknarleikinn og ég held að við séum komnir með tvo mjög góða kosti," sagði Siggi.

„Við áttuðum okkur á því að Mikkel Dahl yrði ekki lengur hjá HB, ég hafði bara samband við hann og út frá því byrjuðu einhverjar viðræður í nóvember/desember. Hann var náttúrulega með mikið af tilboðum og mikið af liðum að tala við hann. Þetta tók smá tíma en ég er virkilega ánægður að við höfum náð að loka því á endanum."

Hvað er það sem Leiknir er með en hin liðin sem Dahl hefði getað valið eru ekki með?

„Þetta er frábær klúbbur og gott „game" í gangi hérna. Það tók ekki langan tíma að sannfæra hann, hann virkar alveg rosalega ákveðinn í að halda áfram að sanna sig. Við erum að fá mann sem var að skora mikið af mörkum, mætir funheitur hingað og er hrikalega flottur íþróttamaður. Þannig við erum himinlifandi með þetta."

Mikkel Jakobsen er að koma í gegnum sama umboðsmann. „Jakobsen er virkilega spennandi leikmaður og um leið og við fórum að skoða hann náið þá áttuðum við okkur á því að þetta er týpa af leikmanni sem hentar okkur rosalega vel. Við ætlumst alveg til jafnmikils af honum og Mikkel Dahl."

„Ég er búinn að horfa á rosalega mikið af leikjum í færeysku deildinni [Betri-deildin], sérstaklega innbyrðisleiki bestu liðanna, þar er spilaður hrikalega góður bolti og toppliðin þar eru ekki langt frá toppliðunum hér held ég. Þó að neðri liðin séu kannski á aðeins lægri klassa en neðri liðin í okkar deild. Þessir leikmenn voru að standa sig vel í stóru leikjunum þannig við mátum það þannig að þeir myndu henta okkur mjög vel."

„Dahl er allt öðruvísi spilari [en Sævar Atli Magnússon], hann er meira inn í teignum að troða boltanum inn. Hann er markheppinn en er samt virkilega duglegur, góður í pressu, góður í stutta spilinu en hans helsta einkenni er að vera inn í teig og skora mörk. Við þurftum svo sannarlega á þannig manni að halda."

„Ég vil að hann [Dahl] komist strax inn í gírinn hjá okkur, þeir eru búnir að vera mjög duglegir og ferskir á þessum fyrstu æfingum. Við búumst við einhverju góðu frá þeim báðum en erum ekki að setja markmið á þá."

Fréttaritari ræddi við Sigga fyrir stuttu og þar ræddi hann um að hann vildi styrkja sóknarlínuna. Ætlaru að styrkja hana enn frekar?

„Við erum að skoða, Leiknir á engan framherja nema Dahl þegar hann kemur inn. Við þurfum að huga að einhverri breidd og einhverjum til að veita honum samkeppni. Ég held að það vanti allavega einn leikmann til að svo verði og við sjáum hvernig það gengur," sagði Siggi.

Viðtalið er lengra og má sjá það í heild sinni í spilaranum efst í fréttinni

Tweet

Senda a Facebook Hafdu samband Senda frétt Prenta frétt Frétta leit