Kári Árnason, varnarmaður íslenska landsliðið, segir að planið hjá sér sé að spila með Víkingi R. í Pepsi Max-deildinni í sumar.
Kári ætlaði að spila með Víkingi síðasta sumar en þá kom upp tilboð frá tyrkneska félaginu Genclerbirligi. Hann samdi þar og hefur leikið þar undanfarið ár eða svo.
Í viðtali við Fótbolta.net eftir tapið gegn Frakklandi í gær var Kári spurður út Víking.
„Það er planið," sagði Kári spurður að því hvort hann myndi spila með Víkingi í sumar.
Félagaskiptaglugginn á Íslandi lokar 15. maí. Kári er ekki viss um að hann komist í Víking fyrir þann tíma. Ef það gengur ekki upp, þá kemur hann í júlí.
„Ég veit ekki hvort ég nái glugganum, það er ólíklegt. En maður veit ekki hvað gerist í fótbolta. Ég vona að gervigrasið hjá Víkingi verði betra en það sem við spiluðum á í Andorra," sagði Kári að lokum
Athugasemdir