36. umferð ensku úrvalsdeildarinnar fer fram um helgina.

Spennan er griðarleg í barátunni um titilinn og leiðir Manchester City í baráttunni við Liverpool með einu stigi fyrir síðustu þrjá leiki deildarinnar.

Fyrsti leikur umferðarinnar fer fram í kvöld þegar Liverpool fær botnlið Huddersfield í heimsókn. Liverpool liðið hefur unnið alla sína leiki síðan liðið gerði jafntefli gegn Everton 3. mars. Huddersfield er löngu fallið.

Laugardagurinn hefst með Lundúnaslag þegar Spurs fær West Ham í heimsókn á nýja heimavöllinn. Spurs situr í þriðja sæti deildarinnar og er í góðri stöðu í baráttunni um Meistaradeildarsæti.

Gylfi Þór Sigurðsson og félagar í Everton heimsækja Crystal Palace klukkan 14:00. Gylfi og félagar unnu gríðargóðan 4-0 heimasigur á Man Utd um síðustu helgi. Palace vann einnig sterkan útisigur á Arsenal.

Cardiff heimsækir Fulham þar sem Aron Einar Gunnarsson og félagar þurfa nauðsynlega á sigri að halda til að halda líflínu í vonum sínum um að halda sér uppi í deildinni. Fulham er nú þegar fallið. Þá mætast Watford og Wolves í baráttunni um sjöunda sætið.

Sunnudagurinn er gífurlega spennandi þar sem Arsenal byrjar á því að heimsækja Leicester. Arsenal hefur tapað tveimur leikjum í liðinni viku þar sem Wolves vann Skytturnar 3-1 á miðvikudag.

Klukkan rúmlega eitt mætir topplið Man City á Turf Moor og heimsækir þar Burnley sem hefur verið á góðu skriði undanfarið. City liðið vann sannfærandi 0-2 sigur á Old Trafford í vikunni og lítur vel út.

Man Utd fær Chelsea í heimsókn í gífurlega mikilvægum leik upp á framhaldið. Tapi United lendir liðið sex stigum á eftir Chelsea í baráttunni um fjórða sætið. Chelsea tapaði tveimur stigum þegar Burnley náði jafntefli á Brúnni síðastliðinn mánudag. United liðið hefur tapað tveimur leikjum í liðinni viku sannfærandi. Fyrst 0-4 á Goodison Park og svo gegn City á miðvikudaginn.