Króatar gera níu breytingar á byrjunarliði sínu fyrir leikinn gegn Íslandi í kvöld. Óhætt er að segja að himinn og haf sé á milli miðvarða Króata þegar kemur að reynslu með landsliðinu.
Duje Ćaleta-Car, 21 árs miðvörður Red Bull Salzburg í Austurríki, spilar sinn fyrsta leik í byrjunarliði Króatíu í kvöld.
Eini landsleikur hans hingað til kom gegn Brasilíu í vináttuleik á Anfield fyrr í mánuðinum en þá spilaði hann 38 mínútur.
Duje fær reynslumikinn mann við hliðina á sér því Vedran Corluka, varnarmaður Lokomotiv Moskvu, er hinn miðvörður Króata í kvöld. Corluka spilaði sinn hundraðasta landsleik gegn Argentínu.
Hinn 32 ára gamli Corluka lék á árum áður með Manchester City og Tottenham en hann er í dag á eftir Dejan Lovren og Domagoj Vida í röðinni hjá Króatíu.
Þeir Lovren og Vida fá frí í dag og það kemur í hlut Duje og Corluka að kljást við sóknarmenn Íslands.
Athugasemdir