"Ég er sammála því að þetta var ekki 6-1 leikur. Okkur var refsað grimmilega fyrir mistök og það er ástæða fyrir að þeir eru í efstu deild og við í 2.deild. Góð lið refsa fyrir mistök sem andstæðingurinn gerir og við fengum að kenna á því í dag," sagði Eyjólfur Héðinsson, leikmaður ÍR , eftir tap gegn FH í Mjólkurbikarnum í kvöld.
Lestu um leikinn: FH 6 - 1 ÍR
"Það var 2-0 í hálfleik en það hefði alveg getað verið 2-1 eða 2-2. Þá vorum við ágætlega sáttir við spilamennskuna en svo komum við út og fengum strax tvö mörk á okkur. Þá var þetta farið að snúast um smá damage control seinustu 40 mínúturnar."
Eins og kunnugt er hætti Arnar Hallsson sem þjálfari ÍR nýlega og Eyjólfur hefur stýrt liðinu í seinustu tveimur leikjum. Hann segist ekki reikna með því að hann taki við liðinu alfarið en útilokar þó ekki neitt.
"Nei ég á ekki von á því. Það kemur eiginlega bara í ljós. Ég er ennþá leikmaður en hef verið að kljást við smá meiðsli. Vonandi verð ég kominn inn á völlinn í næsta leik og ég held það verði fundinn einhver önnur lausn á þessu."
Hann segist samt kunna vel við sig í þjálfarahlutverkinu.
"Ég hef verið að taka þessi námskeið hjá KSÍ og var inni í þjálfarateymi Stjörnunnar á vissan hátt síðastlliðinn tvö ár. Ég á pottþétt eftir að þjálfa eitthvað í framtíðinni. Hvort það verði hjá ÍR núna eða bara einhverntímann seinna kemur bara í ljós."
