Norski knattspyrnustjórinn Ole Gunnar Solskjær var ánægður eftir 2-0 sigurinn á Leicester City í dag en sigurinn þýðir það að liðið tekur þátt í Meistaradeild Evrópu á næstu leiktíð.
Man Utd og Leicester spiluðu hreinan úrslitaleik um síðasta lausa sætið í Meistaradeildina á King Power-leikvanginum í dag. Bruno Fernandes skoraði úr vítaspyrnu og Jesse Lingard gulltryggði sigurinn í uppbótartíma.
Man Utd tók því þriðja sæti deildarinnar og fer beint í riðlakeppni Meistaradeildarinnar.
„Ég er í skýjunum. Við náðum að bóka sæti í Meistaradeild Evrópu eftir að hafa verið langt á eftir öðrum liðum og komist fram úr þeim," sagði Solskjær.
„Við höfum sýnt að við getum verið stöðugir og með rétta hugarfarið. Við erum að byggja upp hóp og kúltur í frammistöðu sem við getum verið stoltir af."
„Ég sagði við drengina að sama hvað myndi gerast í dag þá höfum við nú þegar unnið. Leikmennirnir hafa sýnt gæði sín sem lið. Þeir hafa verið samferða í því sem við viljum og núna er liðið farið að líta meira og meira út sem Manchester United á vellinum."
„Umhverfið er töluvert betra en það var áður," sagði hann í lokin.
Athugasemdir