Martin Keown, fyrrum leikmaður Arsenal og núverandi sparkspekingur, segir að Jose Mourinho, knattspyrnustjóri Manchester United, sé í stríði við leikmenn liðsins.
Það virðist lítið ganga upp hjá United í byrjun tímabils en liðið er í sjöunda sæti með 10 stig, úr leik í enska deildabikarnum og þá eru mörg vandræði innan hópsins.
Mourinho tilkynnti eftir leik að Paul Pogba myndi ekki fá fyrirliðabandið aftur en franski miðjumaðurinn hefur fengið mikla gagnrýni á leiktíðinni og Mourinho vildi þá sömuleiðis minna Pogba á að enginn leikmaður er stærri en félagið.
Martin Keown skilur ekki það sem er í gangi innan félagsins.
„Jose virðist vera í stríði við leikmennina á meðan hann gæti reynt að sjá það góða sem liðið gerir. Er hann að rífa í handbremsuna?" sagði Keown við BBC.
„Fjölmiðlar eru fljótir að kalla þetta krísu. Liðið hefur náð ágætis úrslitum á útivelli en virðist ekki getað unnið heimaleikina sína. Ég hef ekki gaman af því að sjá liðið í þessari stöðu," sagði hann í lokin.
Athugasemdir