Lamine Diaby, framherji Nice í frönsku deildinni, liggur undir grun um að hafa stolið úri úr klefa félagsins en það er í eigu danska framherjans Kasper Dolberg.
Dolberg, sem er 21 árs gamall, gekk til liðs við Nice frá Ajax undir lok gluggans en þann 16. september var úrinu hans stolið úr klefa Nice en það er metið á 70 þúsund evrur.
Danski leikmaðurinn tilkynnti þjófnaðinn til lögreglu en samkvæmt franska blaðinu L'Equipe þá er liðsfélagi hans, Lamine Diaby, grunaður um að hafa rænt úrinu.
Diaby er 18 ára gamall og er uppalinn hjá Nice en verður yfirheyrður af lögreglunni á næstu dögum.
Ef hann verður fundinn sekur um þjófnaðinn þá eru allar líkur á því að hann verði rekinn frá félaginu. Hann spilaði 6 leiki fyrir Nice á síðustu leiktíð en hann hefur ekki enn fengið tækifæri á þessu tímabili.
Athugasemdir