Ítalía: Jafntefli hjá erkifjendunum - Dybala bestur í Róm

Serbneski framherjinn Dusan Vlahovic kom Juventus í eins marks forystu á 27. mínútu. Federico Chiesa fékk að dansa með boltann á vinstri vængnum áður en hann keyrði í átt að teignum, lagði hann á Vlahovic sem setti boltann í fyrsta neðst í hægra hornið.

Inter svaraði sex mínútum síðar og auðvitað var það heitasti framherji deildarinnar, Lautaro Martínez.

Marcus Thuram keyrði upp hægri vænginn, kom með fasta fyrirgjöf meðfram grasinu og á Martínez sem setti boltann vinstra megin við Wojciech Szczesny.

27. mark Martínez í Seríu A á þessu ári.

Síðari hálfleikurinn var fremur daufur og virtist eins og liðin væru bara sátt með að deila stigunum. Lokatölur því 1-1, en Inter er á toppnum með 32 stig á meðan Juventus fylgir fast á eftir með 30 stig í öðru sæti deildarinnar.

Paulo Dybala skoraði og lagði upp í 3-1 sigri Roma á Udinese.

Argentínumaðurinn lagði upp fyrsta mark liðsins fyrir Gianluca Mancini. Dybala tók aukaspyrnu út á velli, inn í teiginn og á hausinn á Mancini sem setti hann í netið.

Florian Thauvin jafnaði metin með skalla á 57. mínútu leiksins áður en Romelu Lukaku setti í fimmta gír.

Hann lagði upp annað markið fyrir Dybala, sem skaut af stuttu færi og þá átti belgíski framherjinn einnig þátt í þriðja markinu sem Stephan El Shaarawy skoraði undir lok leiks.

Góður sigur Roma sem er í 5. sæti með 21 stig á meðan Udinese er í 16. sæti með 11 stig.

Juventus 1 - 1 Inter
1-0 Dusan Vlahovic ('27 )
1-1 Lautaro Martinez ('33 )

Roma 3 - 1 Udinese
1-0 Gianluca Mancini ('20 )
1-1 Florian Thauvin ('57 )
2-1 Paulo Dybala ('81 )
3-1 Stephan El Shaarawy ('90 )