Valgeir Valgeirsson.
Valgeir á æfingu með U21 landsliðinu.
Í leik með HK sumarið 2022.
„Ég er hrikalega spenntur fyrir næsta tímabili og ég hef mikla trú á því að við séum að fara að gera stóra hluti saman," segir Valgeir Valgeirsson, nýr leikmaður Breiðabliks, í viðtali við Fótbolta.net.
Valgeir, sem er 22 ára, valdi að lokum á milli Breiðabliks og Víkings, en hann valdi að fara í græna hluta Kópavogs. Valgeir er uppalinn HK-ingur og hefur þessi ákvörðun hans ekki fallið vel í kramið í Kórahverfinu.
Valgeir, sem er 22 ára, valdi að lokum á milli Breiðabliks og Víkings, en hann valdi að fara í græna hluta Kópavogs. Valgeir er uppalinn HK-ingur og hefur þessi ákvörðun hans ekki fallið vel í kramið í Kórahverfinu.
„Á endanum taldi ég það best að fara í Breiðablik, besta tækifærið fyrir mig á þessum tímapunkti á ferlinum," segir Valgeir.
Af hverju telurðu Breiðablik vera besta möguleikann fyrir þig?
„Fyrst og fremst eru þeir Íslandsmeistarar. Það er ástæða fyrir því að þeir urðu meistarar, þeir eru besta liðið. Þeir eru að fara í forkeppni fyrir Meistaradeildina. Ég vil komast lengra á ferlinum og ég vil komast aftur út. Fyrir mig var Breiðablik liðið til að ná því besta fram úr mér sem leikmanni," segir Valgeir.
Vonar að þau geti skilið þessa ákvörðun
Hann taldi Breiðablik besta möguleikann fyrir sig en þetta var ekki auðveld ákvörðun þar sem hann er uppalinn í HK og kemur úr grjótharðri HK-fjölskyldu.
„Þegar maður var lítill var maður ekki að búast við að þetta myndi gerast einhvern tímann í framtíðinni. Á þessum tímapunkti þarf ég að hugsa hvað er best fyrir mig og ferilinn minn. Þetta er vinnan mín. Ég taldi þetta bestu ákvörðunina fyrir mig upp á ferilinn minn að gera. Ég vil komast aftur út og ég tel þetta besta skrefið svo ég komist aftur út," segir Valgeir.
Hefurðu fundið fyrir miklum hita úr efri byggðum Kópavogs?
„Já, maður hefur heyrt sögur úr Kórnum og hvað menn eru að segja um mann. Það er leiðinlegt og ekki gaman að heyra af þessu. Ég get ekki hugsað um aðra. Ég verð að hugsa hvað er best fyrir mig. Ég vona að fólk geti horft á heildarmyndina þegar horft er í þessa ákvörðun; þau geti skilið þessa ákvörðun hjá mér og stutt á bak við mig sem fótboltamann."
Það gerir mann spenntan
Það mun örugglega taka smá tíma fyrir Valgeir að venjast grænu en hann ætlar sér stóra hluti með Blikum. Félagið fékk tvo aðra leikmenn í síðustu viku, Ágúst Orra Þorsteinsson og Óla Val Ómarsson.
„Það gerir mann spenntan. Þetta eru flottir ungir leikmenn. Við þrír erum ekkert að koma þarna til að hanga. Við ætlum að taka titilinn aftur, bikarinn og ná langt í Evrópukeppninni. Blikar ætla lengra en á síðasta tímabili," segir Valgeir.
Allt viðtalið má sjá í spilaranum hér að ofan.
