Argentínumaðurinn Hector Cuper er búinn að segja starfi sínu lausu hjá Egyptalandi eftir að liðið féll úr leik í riðlakeppninni á Heimsmeistaramótinu í fótbolta.

Egyptaland, sem var að spila á sínu fyrsta HM í 28 ár, tapaði öllum sínum leikjum í A-riðli.

Með Egyptalandi í riðli voru gestgjafar Rússlands, Sádí-Arabía og Úrúgvæ.

Mohamed Salah, lykilmaður Egyptalands, var tæpur fyrir mótið og missti af fyrsta leik vegna axlarmeiðsla sem hann hlaut í úrslitaleik Meistaradeildarinnar. Salah náði seinni tveimur leikjunum og skoraði í þeim báðum en það var ekki nóg.