Daniel Farke, stjóri Norwich, er búinn að staðfesta að Tim Krul verður ekki í hóp um helgina vegna meiðsla. Varamarkvörðurinn Ralf Fährmann er tæpur og því gæti hinn 35 ára gamli Michael McGovern verið á milli stanganna.
Meiðslalisti Norwich er afar langur en þessi tíðindi hafa gert stuðningsmenn félagsins sérstaklega áhyggjufulla. Þeir hafa ekki miklar mætur á McGovern, sem er einnig varamarkvörður norður-írska landsliðsins.
McGovern spilaði síðast heilan fótboltaleik í janúar, þegar Norwich tapaði fyrir Portsmouth í enska bikarnum, 0-1.
Auk leiksins gegn Portsmouth spilaði McGovern fjóra leiki í deildabikarnum á síðustu leiktíð. Hann hefur ekki spilað deildarleik í meira en tvö ár en það þótti ekki mikið til hans koma síðast þegar hann fékk tækifæri með Norwich, í Championship deildinni tímabilið 2016-17.
Farke segir að Krul verður líklegast ekkert með liðinu fyrr en eftir landsleikjahlé. Styttra sé þó í Fährmann, sem gæti verið klár í slaginn strax á morgun.
Norwich heimsækir Crystal Palace á morgun klukkan 14:00.
Athugasemdir